"არ გადააწევინოთ თავი უკან" - რჩევები ცხვირიდან სისხლდენის დროს

ცხვირიდან სისხლდენა ერთ-ერთი ყველაზე გავრცელებული მოულოდნელი მდგომარეობაა, რომელსაც ყოველდღიურ ცხოვრებაში ვხვდებით ხოლმე.

მიუხედავად იმისა, რომ უმეტეს შემთხვევაში ის საშიში არ არის, ჩვენი რეაქცია ხშირად მცდარია.

ალბათ ბევრს გვსმენია რჩევა, რომ სისხლდენისას თავი უკან უნდა გადავწიოთ, ან ცხვირში ბამბის ტამპონი გავიკეთოთ.
დღევანდელი მედიცინა ამტკიცებს, რომ ეს მეთოდები არა მხოლოდ არაეფექტურია, არამედ მდგომარეობის გაუარესებაც შეუძლია გამოიწვიოს.

როგორ მოვიქცეთ, როცა ჩვენ გვერდით ადამიანს ცხვირიდან სისხლი მოსდის და რაში გამოიხატება ჩვენი დახმარება? პედიატრი სალომე ახვლედიანი განმარტავს.

„თუ ცხვირიდან სისხლდენა გაქვთ, არ გადააწევინოთ თავი უკან. ეს სისხლდენას არ აჩერებს, სისხლი უბრალოდ ყელში გადადის. ამან კი შეიძლება ღებინება გამოიწვიოს.

არ ჩაუტენოთ ცხვირში ბამბა, მარლა, ან ცხვირსახოცი. შეიძლება მიეკროს სისხლს კოლტს და ამოღებისას ისევ დაიწყოს სისხლდენა.

დასვით ისე, რომ თავი ჰქონდეს ოდნავ წინ დახრილი და მოუჭირეთ ცხვირის რბილ ნაწილს, დაახლოებით 10 წუთის განმავლობაში,“ - გვირჩევს პედიატრი.