ენერგეტიკული სასმელები და გულის მძიმე გართულებები ახალგაზრდებში - რას აჩვენებს ახალი კვლევა

ენერგეტიკული სასმელებისა და სტიმულატორების შემცველი საკვები დანამატების უსაფრთხოებაზე ახალი მონაცემები გამოქვეყნდა.

მკვლევრებმა აღმოაჩინეს, რომ ეს პროდუქტები გულის გაჩერებისა და ინფარქტის შესახებ შეტყობინებებში არაპროპორციულად ხშირად ფიგურირებს.

ამერიკის გულის ასოციაციამ (AHA) ინფორმაცია 2 ნოემბერს გაავრცელა. კვლევა ასოციაციის 2026 წლის სამეცნიერო სესიებზე, 6–9 ნოემბერს, ჩიკაგოში წარსადგენადაა დაგეგმილი.

ანალიზი მოიცავს აშშ-ის სურსათისა და მედიკამენტების ადმინისტრაციისთვის (FDA) 2017–2025 წლებში მიწოდებულ 28 345 შეტყობინებას შესაძლო გვერდითი მოვლენების შესახებ. მათგან 854 კოფეინის ან სხვა სტიმულატორების შემცველ პროდუქტებს ეხებოდა. სხვა პროდუქტებთან შედარებით, ამ ჯგუფის შეტყობინებებში გულის გაჩერება დაახლოებით 11-ჯერ, ინფარქტი კი 4,5-ჯერ უფრო ხშირად იყო მოხსენიებული.

გულ-სისხლძარღვთა მოვლენების შესახებ ამ ჯგუფის შეტყობინებების დაახლოებით 45% 18–34 წლის ადამიანებს ეხებოდა.

ბაზაში უცნობია, რამდენმა ადამიანმა მოიხმარა ეს პროდუქტები გართულების გარეშე. შესაბამისად, მონაცემებით ინდივიდუალური რისკის გამოთვლა შეუძლებელია. შედეგებზე შესაძლოა სხვა ფაქტორებიც მოქმედებდეს.

ავტორები უფრო სისტემურ მონიტორინგს მოითხოვენ და ექიმებს ურჩევენ, ახალგაზრდა პაციენტებს გულის ფრიალის, გულმკერდის ტკივილისა თუ გულის წასვლის შემთხვევაში ენერგეტიკული სასმელებისა და სტიმულატორების მოხმარებაზეც ჰკითხონ.

კოფეინის დოზასაც მნიშვნელობა აქვს. AHA-ის მიხედვით, დღეში 400 მგ-მდე კოფეინი ზრდასრულთა უმრავლესობისთვის ზოგადად უსაფრთხოდ მიიჩნევა, თუმცა მაღალი დოზები შეიძლება არტერიული წნევის მატებასა და გულის რიტმის დარღვევებს უკავშირდებოდეს.

წყარო: ამერიკის გულის ასოციაცია