"მე თვალს ვადევნებდი შენს მსხვერპლშეწირვას" - ნიცა თავაძე ხვიჩა კვარაცხელიას

ხვიჩა კვარაცხელიას ფეხბურთისგან ხანგრძლივი შესვენება მოუწევს. „ბარსელონასთან“ ჩემპიონთა ლიგის შეხვედრაში მიღებული ტრავმის შემდეგ, მას მარჯვენა მუხლის წინა ჯვარედინი იოგის გაწყვეტა დაუდასტურდა.
"როიტერსის" ინფორმაციით, ფეხბურთელს ოპერაცია და ხანგრძლივი სარეაბილიტაციო პერიოდი ელის.

ამ რთულ დროს ხვიჩას მეუღლე, ნიცა თავაძე, ემოციურ წერილს უძღვნის. ის ერთად გადალახულ სირთულეებს იხსენებს და ხვიჩას არწმუნებს, რომ გამოჯანმრთელების გზაზე ყოველ ნაბიჯს მასთან ერთად გაივლის.

"ერთად ამდენი რამ გამოვიარეთ, ვიზეიმეთ მომენტები, რომლებზეც ერთ დროს მხოლოდ ოცნება შეგვეძლო, და გადავლახეთ გამოწვევები, რომლებმაც გზაში უფრო ძლიერები გაგვხადა...

მაგრამ ვიცი, რომ ადამიანის სიძლიერის ჭეშმარიტი ზომა ის კი არ არის, როგორ დგას, როცა ყველაფერი კარგადაა, არამედ ის, თუ როგორ დგება ფეხზე, როდესაც ცხოვრება ყველაზე რთულ მომენტებს უგზავნის.

მე თვალს ვადევნებდი შენს მსხვერპლშეწირვას, დისციპლინას, მიზანსწრაფვას და ბრძოლას, რომელიც ჩუმად გადაიტანე, რათა ასეთი ყოფილიყავი.

ვიცი შენი გული, შენი ხასიათი და ის ძალა, რომელიც შენშია. და ვიცი, რომ ვერანაირი დაბრკოლება, ვერანაირი წარუმატებლობა და ვერანაირი რთული მომენტი ვერასდროს წაიღებს იმას, რაც ააშენე.

ზოგჯერ ცხოვრება ყველაზე ძლიერ ადამიანებს ისე ცდის, როგორც არასდროს მოელოდნენ. მაგრამ მთელი გულით მჯერა, რომ ეს მომენტი ჩვენი დაუჯერებელი ისტორიის კიდევ ერთი ნაწილი გახდება.

ერთ დღესაც, ამ თავს მოვუბრუნდებით და გავიხსენებთ არა იმას, თუ როგორი რთული იყო, არამედ იმას, თუ რამდენი ძალა დასჭირდა მის გადალახვას.

არასდროს ვყოფილვარ არაფერში ისე დარწმუნებული, როგორც შენში ვარ. არა იმიტომ, რომ გასავლეი გზა ადვილი იქნება, არამედ იმიტომ, რომ ვიცნობ იმ ადამიანს, ვინც მას გაივლის.

ყოველ გამარჯვებაში, ყოველ გამოწვევაში, ყოველ ცრემლსა და ყოველ ტრიუმფში, შენს გვერდით ვიდგები. ამ მოგზაურობის არცერთ მომენტს მარტო არ გაივლი.

ჩვენ უკვე დავწერეთ რამდენიმე დაუჯერებელი თავი ერთად და საუკეთესოები ჯერ კიდევ წინ გვაქვს.

ჩვენი ისტორია აქ არ მთავრდება. სწორედ აქ იწყება კიდევ ერთი დაბრუნება. უფრო ძლიერები დავბრუნდებით, ვიდრე ოდესმე. ერთად. ყოველთვის. მიყვარხარ," - წერს ნიცა თავაძე.