მხოლოდ წონას უყურებთ? სიმსუქნის რისკს შესაძლოა ვერ ამჩნევდეთ

რამდენად ზუსტად ასახავს წონა ადამიანის ჯანმრთელობის მდგომარეობას?

ჟურნალ Nature-ში 11 ნოემბერს გამოქვეყნებული კვლევა აჩვენებს, რომ სიმსუქნისა და მასთან დაკავშირებული რისკების შესაფასებლად მხოლოდ სხეულის მასის ინდექსი (BMI) საკმარისი არ არის.

მეცნიერებმა ჩინეთში, დიდ ბრიტანეთში, აშშ-სა და ესპანეთში მცხოვრები 844 108 ზრდასრულის მონაცემები გააანალიზეს. შედეგებმა აჩვენა, რომ წონასა და სიმაღლესთან ერთად წელის გარშემოწერილობა და ორგანოების ფუნქციაც გასათვალისწინებელია.

BMI წონისა და სიმაღლის მიხედვით გამოითვლება, თუმცა უშუალოდ ვერ ზომავს ცხიმის რაოდენობასა და მის განაწილებას. ამიტომ ერთნაირი ინდექსის მქონე ადამიანებს ჯანმრთელობის განსხვავებული რისკები შეიძლება ჰქონდეთ.

სპეციალისტების რეკომენდაციით, შეფასება საჭიროებისამებრ უნდა შეივსოს წელის გაზომვით, სხეულის შემადგენლობის გამოკვლევითა და კლინიკური მონაცემებით.

მიდგომა, რომელიც Lancet-ის კომისიამ 2025 წელს შესთავაზა, ორ მდგომარეობას განასხვავებს: პრეკლინიკურ სიმსუქნეს - როდესაც ჭარბი ცხიმი არსებობს, მაგრამ ორგანოების ფუნქცია შენარჩუნებულია და კლინიკურ სიმსუქნეს - როდესაც ჭარბი ცხიმი უკვე არღვევს ორგანოების მუშაობას ან ზღუდავს ყოველდღიურ საქმიანობას.

ახალ კვლევაში კლინიკური სიმსუქნე სიკვდილიანობის უფრო მაღალ რისკთან იყო დაკავშირებული, ვიდრე პრეკლინიკური მდგომარეობა.

თუმცა მეცნიერები ხაზს უსვამენ, რომ ყურადღებასა და რისკების მართვას პრეკლინიკური მდგომარეობაც საჭიროებს.

წყარო: ჟურნალი Nature