"უსაყვარლესი ნუნუ დუღაშვილი აღარ გვყავს"

93 წლის ასაკში კომპოზიტორი ნუნუ დუღაშვილი გარდაიცვალა. ინფორმაციას კომპოზიტორის ახლობლები სოციალურ ქსელში ავრცელებენ.

ნუნუ დუღაშვილი თბილისის საპატიო მოქალაქე, ღირსების ორდენის კავალერი, აკაკი წერეთლის სახელობის პრემიის ლაურეატი, საქართველოს ხელოვნების დამსახურებული მოღვაწე გახლდათ.

"ძალიან დიდი, ძვირფასი და უსაყვარლესი ქალბატონი ნუნუ დუღაშვილი აღარ გვყავს.

წავიდა და დაგვიტოვა დიდი საგანძური.

მშვიდად განისვენეთ დიდებულო ქალბატონო. ძალიან მიყვარდა" - წერს რეჟისორი დავით გერსამია.

1959-1962 წლებში ნუნუ დუღაშვილი მუშაობდა კინოსტუდია „ქართული ფილმის“ დოკუმენტური ფილმების სტუდიაში მუსიკალურ რედაქტორად. 1962 წლიდან ეწეოდა პედაგოგიურ მოღვაწეობას ზ. ფალიაშვილის სახელობის მუსიკალურ ათწლედში. 1965-2002 წლებში იყო საქართველოს ტელევიზიის მუსიკალური გაფორმების განყოფილების უფროსი.

პოპულარობა მოიპოვა მისმა სიმღერებმა: „ქუთაისო“, „იმერეთის ნიავი“, „ღმერთი სიყვარულისა“, „ბათუმი რად ღირს, მარტო“, „ჩემი სიმღერა“, „კახეთო“, „სამშობლო“, „თბილისო, სიყვარულო“. დაწერილი აქვს ასევე საფორტეპიანო კონცერტი, საფორტეპიანო სონატა, მუსიკა დოკუმენტური და სატელევიზიო, აგრეთვე თოჯინური ფილმებისთვის.

დიდი საკონცერტო დარბაზის წინ 2012 წელს კომპოზიტორის ვარსკვლავი გაიხსნა.